Кўз касалликлари бўйича жарроҳ Жамшиддин Сагдиев кўзни қандай суюқликларда ювиб туриш фойда бериши ҳақида тавсиялар берди. Бу ҳақда “Дарё.уз” хабар берди.

Шифокорнинг айтишича, фурацилин эритмаси, мойчечак ёки кўк чой дамламаси кўзни чайиш унинг дам олишига ёрдам беради. Баъзи беморларга кўзга дори томизишдан олдин кўзни дамламаларда ювиш тавсия қилинади. Бунда кўз “енгиллашади”, ундаги ортиқча моддалар чиқиб кетади ва томчи дорилар яхши натижа беради.

Кўз чайишни кунига 6-7 маҳалгача қилиш мумкин. Бунинг ҳеч қандай кўзга зарари йўқ.

Қандай бажарилади?
Масалан, кўк чой дамламаси тайёрланиб, шприц ёки пахтага шимитган ҳолда кўзга қуйилади. Бу амалиётдан 5-10 дақиқа ўтиб, одатий иш тартибида давом этиш мумкин.

Фойдаси
Биринчи ўринда кўз ичидаги бактериялар, инфекциялар, ташқи чанглар каби ортиқча моддаларни чиқариб юборади. Шунингдек, кўз қуриши синдромини олдини олади. Кўз шамоллашини бартараф этишда ҳам жуда фойдали.

Қандай ҳолатларда мумкин эмас?
Беморнинг кўзида линза бўлса, ювиш мумкин эмас. Боиси чайиш вақтида линза чиқиб кетиши мумкин. Жарроҳлик амалиётидан кейин, жароҳатлар янги бўлган даврда кўзни чайиш тавсия этилмайди.

• саломатлик