Навоий шаҳрида сохта электрон ҳисоб-фактуралар ва харид чеклари орқали 34,8 млрд сўмлик ноқонуний кешбэк ўзлаштирилгани аниқланди. Бош прокуратура ҳузуридаги Иқтисодий жиноятларга қарши курашиш департаментининг Навоий шаҳри бўлими томонидан ўтказилган терговга қадар текширувда 13 та масъулияти чекланган жамиятнинг масъул шахслари ва бошқа фуқаролар ўзаро тил бириктириб ҳаракат қилгани маълум бўлган. Тергов материалларига кўра, улар 4,5 триллион сўмлик маҳсулотлар етказиб берилгани ҳақида сохта электрон ҳисоб-фактураларни расмийлаштирган.

Шунингдек, гўёки маҳсулотлар назорат-касса машиналари орқали аҳолига сотилгани ҳақида харид чеклари шакллантирилган. Натижада 105 524 нафар фуқаро номига Soliq Mobile иловаси орқали жами 34,8 млрд сўм миқдорида кешбэк ҳисобланиб, ушбу маблағлар ноқонуний равишда ўзлаштирилган. Ҳолат юзасидан Жиноят кодексининг фирибгарлик ҳамда ҳужжатларни қалбакилаштиришга оид моддалари билан жиноят иши қўзғатилган. Айни пайтда тергов ҳаракатлари давом этмоқда.