Ижтимоий тармоқларда “Ўрикзор” бозорида ёнғин содир бўлгани ҳақида тарқалган хабарлар юзасидан Фавқулодда вазиятлар бошқармаси расмий маълумот берди.

Қайд этилишича, 4 июль куни соат 04:26 да Тошкент шаҳрининг Учтепа тумани, Тошкент ҳалқа автомобиль йўли кўчасида жойлашган “Ўрикзор” бозоридаги дўконлардан бирида ёнғин содир бўлгани ҳақида хабар келиб тушган.

Ҳодиса жойига қутқарув бўлинмалари соат 04:35 да етиб бориб, ёнғинни соат 04:48 да қуршаб олган. Ёнғин эса соат 05:01 да тўлиқ бартараф этилган.

Дастлабки маълумотларга кўра, ёнғин оқибатида озиқ-овқат дўконининг 150 квадрат метр майдони ёниб зарарланган. Ҳодиса натижасида жабрланганлар қайд этилмаган.

Айни пайтда ёнғиннинг келиб чиқиш сабаблари ҳамда етказилган моддий зарар миқдорини аниқлаш ишлари олиб борилмоқда.