Ижтимоий тармоқларда тарқалаётган Навоий шаҳрида Олимпиада чемпиони бир фуқарони уриб тан жароҳати етказганлиги тасвирланган видеохабар юзасидан вилоят ИИБ расмий муносабат билдирди.

Мазкур ҳолат Навоий вилояти ИИБ томонидан ўрганилган. Аниқланишича, воқеа жорий йилнинг 22 август куни тунги соат 2:00 ларда Навоий шаҳар “Зиёкор” маҳалласи ҳудудида содир этилган бўлиб, Кармана туманида яшовчи 1994 йилда туғилган С.А. мазкур маҳалла ҳудудида жойлашган ресторанларнинг бирига ўзига яқиндан таниш бўлган фуқаролар билан овқатланиш учун борган. Якунда фуқаро С.А. тўловни амалга оширган ва етмай қолган маълум миқдордаги пул маблағини автомашинадан олиб бериш учун ташқарига чиққан вақтида, мазкур ресторанда ишловчи 2004 йилда туғилган фуқаро М.У. унинг олдига бориб, қолган тўлов пулини ҳам амалга оширишини сўраган. Спиртли ичимлик таъсирида бўлган С.А. ўзаро оғзаки тортишиб қолиб, жамиятда юриш-туриш қоидаларини қасдан менсимасдан, ўзига олдиндан таниш бўлмаган фуқаро М.У.ни ҳеч бир сабабларсиз қўли билан юз соҳасига уриб, тан жароҳати етказган.

Суриштирувлар давомида гумонланувчи фуқаро С.А. олимпиада чемпиони эмаслиги, ўша куни ресторанга 1995 йилда туғилган диск улоқтириш бўйича икки карра паралимпияда чемпиони, фуқаро Э.С. билан биргаликда унинг автомашинасида борганлиги, ўзаро тортишув келиб чиққан жараёнда фуқаро Э.С. автомашина салонида бўлганлиги ва ҳолатга кейинчалик аралашиб, фуқаро С.А.ни тинчлантиришга ҳаракат қилганлиги ҳамда жабрланувчи фуқарога тезкорлик билан ёрдам кўрсатганлиги маълум бўлди.

Ҳолат юзасидан Ўзбекистон Республикаси Жиноят Кодексининг 277-моддаси 1-қисми билан жиноят иши қўзғатилган ва гумонланувчи С.А. процессуал тартибда ушланган. Ҳозирда тергов ҳаракатлари олиб борилмоқда.

• ИИБ
• Janjal
• Навоий
• fuqaro