Санитария-эпидемиология қўмитаси ахборот хизматининг маълум қилишича, ўқувчилар ўртасида “Сиз қайси маҳсулотларни кўп истеъмол қиласиз?”, “Ота-онангиз нималарни ейишингизга рухсат бермайди?” деган саволлар асосида сўровнома ташкил қилинган. Сўровномани Санитария, гигиена ва касб касалликлари институти илмий тадқиқотчилари ўтказишган.

Сўровнома натижаларига кўра қуйидаги маҳсулотларни ўқувчилар энг кўп истеъмол қилади:

- қовурилган таомлар – 31,5 фоиз;

- фаст-фудлар – 28,8 фоиз;

- турли салатлар – 25,7 фоиз;

- қандолат маҳсулотлари – 25,5 фоиз;

- суюқ таомлар – 25,2 фоиз;

- музқаймоқ – 12,2 фоиз;

- тез пишувчи лапшалар (роллтон ва бошқалар) – 7,6 фоиз;

- попкорнлар – 7,5 фоиз;

- чипслар – 5,2 фоиз.

Қайси маҳсулотларни истеъмол қилишингизга ота-онангиз рухсат бермайди, деган саволга эса қуйидагича жавоб берилган:

- энергетик ичимликлар – 52,2 фоиз;

- “кириешки” ва чипслар – 43,4 фоиз;

- “кукуруз” ва попкорнлар – 21,1 фоиз;

- тез пишувчи лапшалар – 18,9 фоиз;

- фаст-фудлар – 14,5 фоиз.

Хулосада аҳоли, айниқса, ёшлар ўртасида соғлом овқатланишни, яъни рацион бўйича оқсил, витамин ва микроэлементларга бой бўлган мева-сабзавотларни, сут ва гўшт маҳсулотларини кўпроқ истеъмол қилиш ҳамда жисмоний фаоллик тавсия этилган.

• Lifestyle
• Sanitariya
• тадқиқот