Сўнгги йилларда Ўзбекистонда тоғ-конь саноатини ривожлантириш ва соҳани модернизация қилиш бўйича кенг кўламли ислоҳотлар амалга оширилмоқда. Натижада тўққиз йил давомида тармоққа 10 миллиард доллар миқдорида хорижий инвестиция жалб қилинди.

Аввал қимматбаҳо ва рангли металларни қазиб олиш билан асосан икки йирик комбинат шуғулланган бўлса, конларни инвесторларга бериш бўйича шаффоф тизим жорий этилиши натижасида бугунги кунда соҳада 65 та хусусий корхона фаолият юритмоқда.

Статистик маълумотларга кўра, мустақилликнинг дастлабки 25 йилида олтин қазиб олиш ҳажми 63 тоннадан 87 тоннагача ошган бўлса, сўнгги тўққиз йилда яна 31 тоннага кўпайиб, ўтган йили 118,4 тоннага етди.

Шунингдек, 2016 йилдан буён кумуш ишлаб чиқариш 1,6 баробар, уран ишлаб чиқариш 2,1 баробар, мис ишлаб чиқариш эса 1,4 баробар ошди. Натижада тоғ-конь саноатида ишлаб чиқариш ҳажми 1,7 баробарга ўсиб, ўтган йил якунида 270 триллион сўмга етди.

Мутахассисларнинг таъкидлашича, юқори даромадли иш ўринларининг катта қисми айнан ушбу соҳада яратилган. Ҳозирда экскаватор машинистлари 30 миллион сўмгача, бурғилаш мутахассислари ва йирик самосвал ҳайдовчилари 40 миллион сўмгача, геолог ҳамда маркшейдерлар эса 70 миллион сўмгача ойлик маош олмоқда.

• Инвестиция
• Президент
• sanoat
• tadbir