2026-йил 1-июлдан бошлаб Ўзбекистонда нодавлат тиббиёт муассасаларига давлат бюджети ҳисобидан беморларга хизмат кўрсатишга рухсат берилади. Бу президентнинг янги фармонида белгиланди.

Унга кўра, хусусий клиникалар давлат билан шартнома асосида ишлайди ва даволаш харажатлари ягона базавий тарифлар бўйича қопланади. Бу тизим давлат ва хусусий сектор ўртасида тенг шароит яратишгақаратилган.

 Бюрократия қисқартирилади

Аккредитациядан ўтган тиббиёт муассасалари учун давлат билан шартнома тузишда қўшимча эксперт хулосаси талаби бекор қилинади. Шунингдек, беморларни амбулатор даволаш ва жарроҳлик амалиётларига йўналтириш тартиби жорий этилади.

Давлат маблағларини клиникалар кесимида тақсимлаш амалиёти бекор қилиниб, эндиликда маблағлар касалликлар йўналишлари бўйича белгиланади.

Лицензия тизими ҳам ўзгаради

Эндиликда қоидабузарлик аниқланса, клиниканинг бутун фаолияти эмас, балки фақат тегишли йўналиши бўйича лицензияси вақтинча тўхтатилади.

200 млн долларлик қўллаб-қувватлаш

Фармонга кўра, 200 миллион доллар миқдорида имтиёзли кредит линияси очилади. Ушбу маблағлар ҳудудларда замонавий клиникалар ташкил этишга йўналтирилади.

Кредитлар 10 йил муддатга, 3 йиллик имтиёзли давр билан ажратилади. Шунингдек, фоизларнинг бир қисми давлат томонидан компенсация қилинади.

🔹 Аккредитация мажбурий бўлади

Янги ташкил этилган клиникалар 3 йил ичида миллий ёки халқаро аккредитациядан ўтиши шарт этиб белгиланди.