Президентнинг 2020 йил 30 октябрдаги “Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида”ги фармони 4-банди ўз кучини йўқотди.

Бу ҳақдаги Президент фармони жорий йил 7 апрел куни имзоланган.

Унга кўра, шу кунга қадар аҳолини кунлик юриш ва югуришга тарғиб қилиш мақсадида ишлаб чиқилган “Соғлом турмуш тарзи” (www.1hls.uz) платформаси иш фаолияти тўхтатилган.

Маълумот учун, мазкур платформада бир суткада ўн минг ва ундан ортиқ қадам юрган Ўзбекистон фуқаросининг платформадаги электрон ҳамёнига 3 минг сўмдан, ҳар ойда ҳар бир туман (шаҳар) бўйича энг кўп юрган шахсга 300 минг сўмдан, ҳар бир ҳудуд бўйича энг кўп юрган шахсга 500 минг сўм, республика бўйича энг кўп юрган шахсга 1 миллион сўм қўшимча равишда платформадаги электрон ҳамёнига ўтказилиши белгиланган эди.

Кейинроқ, 2021 йил 9 ноябрдаги видеоселекторда Шавкат Мирзиёев “Соғлом турмуш тарзи” платформасида фойдаланувчилар сони 600 минг нафарга етгани, Молия вазирлигига келгуси йилда бу борадаги тарғибот ишларини кучайтариш ва платформадан фойдаланувчилар кўламини янада кенгайтиришга қўшимча 60 миллиард сўм ажратишга кўрсатма берилгани маълум қилинди.

Бироқ, 2022 йил 15 январига келиб, ПФ-6099-сонли Президент фармонига ўзгариш киритилиб, ҳар куни 10 минг қадам пиёда юрганларга 3 минг сўм бериш тизими тўхтатилди ва янги тизим – ҳар ҳафта 100 млн сўм ва мингта велосипед бериш тизими ишга туширилгани эълон қилинди.

Аммо, бундан 3 ой ўтиб, бу тизим ҳам тўхтатилди ва юқоридаги ҳужжат билан ушбу тизим бутунлай бекор қилинди.

• Фармон
• Мирзиёев
• саломатлик