Президент Шавкат Мирзиёев раислигида саноат кооперациясини ривожлантириш ва ишлаб чиқаришни маҳаллийлаштириш чора-тадбирлари юзасидан видеоселектор йиғилиши бўлиб ўтмоқда.

Мазкур йиғилишда янги бозорларга кириш учун маҳаллий саноатга халқаро стандартларни кенг жорий қилиш зарурлиги қайд этилган.

Мисол учун, 2019-2021 йилларда 2 мингта экспортчи халқаро сертификатлар олгани ҳисобига уларнинг экспорти 1,5 баробарга (590 миллион доллардан 920 миллион долларга) ошди.

Шу боис, “Ўзстандарт” агентлигига 2022 йилда:

- тўқимачилик саноатида 150 та;
- электротехникада 50 та;
- озиқ-овқат саноатида 200 та корхонада халқаро сертификатларни жорий қилиш вазифаси қўйилди.

Таъкидланишича, бунинг учун 1 майга қадар ҳар бир вилоятдаги Лойиҳа офислари ҳузурида камида иккитадан Халқаро стандартларни ўргатиш марказларини ташкил этиш топширилган.

Бунда, ҳудудларнинг ихтисослашувига қараб, уларга хорижий мутахассисларни олиб келиш ва маҳаллий корхоналарга халқаро стандартларни ўргатиш бошланади.

Шунингдек, жорий йил 1 июнга қадар тўқимачилик саноатида 2 та, электротехникада 1 та, озиқ-овқат саноатида 3 та лаборатория ташкил қилиш вазифаси қўйилди.

Қайд этилишича, йиғилишда қурилиш материаллари соҳасида 2022 йилда 28 триллион сўмлик маҳсулот ишлаб чиқариш ҳамда 600 миллион долларлик экспортни таъминлаш зарурлиги таъкидланган.

Бундан ташқари, мутасаддилар вилоят ҳокимлари билан бирга 2022 йилда 1,8 миллиард долларлик 420 та йирик лойиҳани амалга ошириши шартлиги кўрсатиб ўтилган.

1 июлга қадар 150 миллион доллар, йил якунига қадар яна 300 миллион доллар маблағларни жалб этиб, соҳадаги инвестиция лойиҳаларини муддатида молиялаштиришни ташкил этиш зарурлиги айтиб ўтилган. 

• Президент
• Шавкат Мирзиёев
• “O‘zstandart” agentligi