Президент Шавкат Мирзиёев 2 ноябрь куни Тошкент шаҳрининг Учтепа туманидаги «Интил» халқаро тил ва касбга ўқитиш марказида меҳнат миграцияси соҳасидаги устувор вазифаларга бағишланган йиғилиш ўтказди. Унда хорижда меҳнат қилаётган фуқароларнинг ҳуқуқларини ҳимоя қилиш ва муаммоларини тезкор ҳал этиш масалаларига алоҳида эътибор қаратилди.

Давлат раҳбари чет элда ишлаётган юртдошларимизнинг меҳнатини эътироф этиб, уларни оиласи ва фарзандлари келажаги учун меҳнат қилаётган мард инсонлар деб атади.

«Чет элда ишлаётган ҳар бир юртдошимиз оиласининг ризқи, фарзандлари келажаги учун тинимсиз меҳнат қилаётган ҳақиқий мард инсонлардир. Улар ҳам бизнинг фуқароларимиз, бизнинг фарзандларимиз. Қаерда ишлашидан қатъи назар, фуқароларимиз ҳуқуқини ҳимоя қилиш — давлатнинг доимий бурчи ва вазифаси», — деди Президент.

Йиғилишда хорижда муаммога дуч келган фуқаролар элчи ёки консулни мустақил излаб юрмаслиги учун янги тартиб жорий этилиши маълум қилинди. Эндиликда улар «Онлайн маҳалла» платформаси орқали ёрдам сўраб мурожаат қолдириши мумкин бўлади. Зарур ҳолатларда элчининг ўзи фуқаронинг олдига бориб, унинг ҳуқуқларини ҳимоя қилиш ва муаммосини ҳал этишга кўмаклашади.

Президент мутасаддиларга мазкур тизимни 10 кун ичида йўлга қўйиш ҳамда унинг самарали ишлашини таъминлаш бўйича таклифлар киритишни топширди.