Ўзбекистонда атмосфера ҳавосини муҳофаза қилиш бўйича назорат тадбирлари кучайтирилмоқда. Сўнгги кунларда экологик талабларга риоя қилмаган корхоналар фаолияти тўхтатилди, ҳаво таркибини ўрганиш учун янги ускуна ишга туширилди. Шунингдек, мутахассислар куз-қиш мавсумида ҳаво ифлосланишининг асосий сабаблари ҳақида тушунтириш берди.

Филтрларсиз ишлаган корхоналар тўхтатилди

Наманган шаҳрининг Давлатобод туманидаги “Порлоқ” маҳалласи аҳолиси совун ишлаб чиқариш цехидан тарқалаётган ёқимсиз ҳид юзасидан мурожаат қилган. Тошкент шаҳрининг Сергели туманида эса фильтри носоз иссиқхона фаолияти тўхтатилган.

Куз ва қишда ҳаво нега ифлосланади?

Финляндия метеорология институти мутахассиси Катя Ловен совуқ мавсумда ҳаво сифати ёмонлашишига сабаб бўладиган омилларни тушунтирди. Киото университети доценти Тимур Хожаназаров эса Марказий Осиё, хусусан, Тошкентдаги ҳаво ифлосланиши масаласига тўхталди.

Ҳаво сифатини аниқлаш учун янги ускуна ишга туширилди

Ҳаводаги заррачалар таркибидаги органик ва элементар углерод миқдорини аниқлайдиган замонавий термал-оптик анализатор фойдаланишга топширилди. Ускуна ҳаво таркибини илмий жиҳатдан чуқур ўрганиш имконини беради.

Барг ёқиш ҳам ҳавони ифлослантиради

Мутахассислар кузда барглар, шох-шаббалар ва бошқа ўсимлик қолдиқларини ёқиш оқибатида атмосфера ҳавосига инсон саломатлиги учун зарарли моддалар ажралиб чиқишини эслатди. Ушбу ҳолатларнинг олдини олиш ва жавобгарлик чоралари бўйича махсус брифинг ҳам ўтказилди.

Корхоналар оқова сувларни тозаламасдан ташлаган

Тошкент вилоятининг Юқори Чирчиқ туманида ўтказилган экологик рейдлар давомида оқова сувларни тозаламасдан очиқ ҳудудга ташлаш ҳолатлари аниқланган.

Иқлим ўзгариши ҳаво сифатига қандай таъсир қилади?

Жеймс Кук университети профессори Бен Жариҳани иқлим ўзгариши ва метеорологик шароитларнинг Марказий Осиёдаги ҳаво сифатига таъсири ҳақида фикр билдирди.

Шунингдек, атмосфера ҳавосини муҳофаза қилиш ва “Тоза ҳаво” умуммиллий лойиҳаси доирасида амалга оширилаётган ишлар юзасидан матбуот анжумани ташкил этилди.

Экология ва иқлим ўзгариши миллий қўмитаси ҳаво сифатини яхшилаш, экологик назоратни кучайтириш ва ифлосланиш манбаларининг олдини олиш бўйича ишларни давом эттирмоқда.