Қашқадарёда сувдан ноқонуний фойдаланиш бўйича ишни судга чиқармаслик эвазига пул олган мутахассис ушланди

Қашқадарё вилоятида ичимлик сувидан ноқонуний фойдаланиш ҳолати бўйича расмийлаштирилган ҳужжатларни судга чиқармасликни ваъда қилиб, пул олган мутахассис ушланди.

Бош прокуратура ҳузуридаги Департаментнинг Қашқадарё вилояти бошқармаси томонидан ўтказилган тезкор тадбирда аниқланишича, “Қашқадарё сув таъминоти” АЖ ичимлик сув тизими назорат бўлими мутахассиси С.М. хизмат мавқеидан фойдаланиб, фуқаро Х.Б.дан унинг ўғли Н.Б.га нисбатан тузилган далолатномани судга юбормаслик ҳамда қайта ҳисоб-китоб қилиш орқали зарарни бартараф этиш эвазига 1,2 млн сўм талаб қилган.

У банк пластик картаси орқали 1,2 млн сўмни қабул қилиб олган вақтида ашёвий далиллар билан ушланган. Мазкур маблағ процессуал тартибда қайтарилган.

Ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари олиб борилмоқда.