Туркия Президенти Ражаб Тоййиб Эрдўған Анқарада ўтган НАТОнинг 36-саммити якунида альянс етакчиларига уларнинг исми ўйиб ёзилган махсус ишлаб чиқарилган тўппонча ва бир қути ўқ-дорини совға қилди. Бу ҳақда Haber7 хабар берди. Маълум қилинишича, бундай совғалар Европа комиссияси раиси Урсула фон дер Ляен, Европа кенгаши президенти Антониу Кошта ҳамда қатор Европа давлатлари раҳбарларига топширилган.

Бироқ Антониу Коштага берилган тўппонча хавфсизлик хизмати томонидан текшириш учун олиб қўйилган. Европалик расмийларга кўра, ушбу қурол Белгияда амал қиладиган қатъий қурол қонунчилиги талабларига мос келмайди. Шу сабабли Кошта ва Урсула фон дер Ляен уни шахсан сақлаши кутилмаяпти. Буюк Британия Бош вазири Кир Стармер эса мамлакатдаги қурол импорти бўйича қонунчилик сабаб совға қилинган тўппончани ўзи билан олиб кетмаган.

Қурол зарур тартиб-таомиллар бажарилгунга қадар Буюк Британиянинг Анқарадаги элчихонасида сақланади. Шунингдек, Туркия томони етакчиларга совға қилинган қуролларни ўз мамлакатларига олиб чиқиш учун зарур экспорт ҳужжатларини ҳам тақдим этган.