Энг оғир вазият Испаниянинг Андалусия минтақасида қайд этилиб, камида 12 киши ҳалок бўлган, яна 23 киши бедарак йўқолган.

Андалусия ҳукумати раҳбари Хуанма Моренонинг маълум қилишича, ёнғин электр узатиш тармоғидаги носозлик сабаб юзага келган бўлиши мумкин. Аланга Альмерия провинциясидаги Лос-Гальярдос ҳудудидан тез суръатда ўрмонларга тарқалган.

Вазиятни назоратга олиш учун Испания Фавқулодда вазиятлар бўйича ҳарбий бўлинмасининг 220 нафар ҳарбий хизматчиси ва 70 та махсус техникаси ҳудудга сафарбар этилган. Расмийлар буни мамлакат тарихидаги энг ҳалокатли ўрмон ёнғинларидан бири сифатида баҳоламоқда.

Мутахассислар ва олимлар юзага келаётган офатни глобал иқлим ўзгариши билан боғламоқда. Уларнинг таъкидлашича, Ўрта Ер денгизи ҳудудида кузатилаётган узоқ давом этувчи жазирама ва қурғоқчилик йирик ёнғинлар хавфини кескин оширмоқда.

Францияда эса кучли иссиқ сабаб тарихда илк бор бутун мамлакат бўйлаб фавқулодда тайёргарлик режими жорий этилмоқда. 10 июль куни мамлакатнинг тўққизта департаментида хавфнинг энг юқори — «қизил» даражаси эълон қилинди.

Ҳукумат аҳолининг эҳтиёжманд қатламлари учун совутиш марказларини ташкил этмоқда ҳамда фавқулодда вазиятларга тезкор жавоб бериш мақсадида фуқаролар муҳофазасининг махсус механизмини ишга туширди.

Франция жорий йил бошидан буён учинчи марта кучли жазирама тўлқинига дуч келмоқда. Аномал иссиқ ва қурғоқчилик оқибатида мамлакат бўйлаб ўрмон ёнғинлари сони ва кўлами ортиб бормоқда.