Қорақалпоғистон Республикасида кузатилаётган кучли жазирама сабабли Нукус шаҳри ва яна 8 та тумандаги давлат ҳамда нодавлат мактабгача таълим ташкилотлари фаолияти вақтинча тўхтатилади. Бу ҳақда Қорақалпоғистон Республикаси Мактабгача ва мактаб таълими вазирлиги маълум қилди.

Маълум қилинишича, қарор болалар саломатлигини юқори ҳароратнинг салбий таъсиридан ҳимоя қилиш ҳамда уларнинг хавфсизлигини таъминлаш мақсадида қабул қилинган. Фаолиятни вақтинча тўхтатиш муддатлари шаҳар ва туман ҳокимларининг қарорлари ҳамда санитария-эпидемиологик хизматнинг хулосалари асосида белгиланган.

Вақтинча ёпиладиган ҳудудлар ва муддатлар қуйидагича:

• Нукус шаҳри — 13–18 июль;
• Амударё тумани — 13–15 июль;
• Беруний тумани — 13–17 июль;
• Хўжайли тумани — 13–18 июль;
• Тахиатош тумани — 13–17 июль;
• Шуманай тумани — 13–17 июль;
• Мўйноқ тумани — 13–17 июль;
• Қонликўл тумани — 13–17 июль;
• Тўрткўл тумани — 13–17 июль.

Вазирлик ота-оналарга мурожаат қилиб, фарзандларининг саломатлигига алоҳида эътибор қаратиш, уларни куннинг энг иссиқ вақтларида очиқ ҳавода узоқ қолдирмаслик ва барча эҳтиёт чораларига амал қилишни сўради.