O‘zbekistonda ustuvor yo‘nalishlarda tahsil olayotgan doktorantlar stipendiyasi 1,7 barobarga oshiriladi. Shuningdek, Oliy attestatsiya komissiyasi (OAK) faoliyati Fanlar akademiyasi tizimiga o‘tkaziladi.

Bu haqda Prezident Shavkat Mirziyoyev ishtirokida o‘tkazilgan taqdimotda ma’lum qilindi.

Qayd etilishicha, sun’iy intellekt, qayta tiklanuvchi energiya, oziq-ovqat xavfsizligi, tibbiyot, suv resurslari, yangi materiallar hamda seysmologiya kabi ustuvor yo‘nalishlardagi doktorantlarni qo‘llab-quvvatlashning yangi tizimi joriy etiladi.

Shuningdek, ilmiy tadqiqotlar uchun asbob-uskunalar va reagentlar xaridiga qo‘shimcha mablag‘ ajratilishi rejalashtirilmoqda.

Dissertatsiya himoyasi jarayonlaridagi ortiqcha byurokratik tartib-taomillar 50 foizga qisqartiriladi. Jumladan, ko‘plab hujjatlarni chop etish, avtoreferatlarni katta hajmda tayyorlash va dissertatsiyalarni qayta muhokama qilish kabi talablar bekor qilinadi.

Bundan tashqari, “Loyiha doirasida ilmiy daraja” va “Amaliy doktorantura” dasturlari yo‘lga qo‘yiladi. Ushbu tizim orqali PhD darajasi real sektor korxonalari bilan hamkorlikdagi amaliy loyihalar asosida olinadi.

Prezident ilmiy tadqiqotlar sifatini oshirish va ilm-fanni iqtisodiyot bilan integratsiya qilish muhimligini ta’kidlab, mutasaddilarga tegishli topshiriqlar berdi.

Кириллча

Ўзбекистонда докторантлар стипендияси 1,7 баробарга оширилади

Ўзбекистонда устувор йўналишларда таҳсил олаётган докторантлар стипендияси 1,7 баробарга оширилади. Шунингдек, Олий аттестация комиссияси (ОАК) фаолияти Фанлар академияси тизимига ўтказилади.

Бу ҳақда Президент Шавкат Мирзиёев иштирокида ўтказилган тақдимотда маълум қилинди.

Қайд этилишича, сунъий интеллект, қайта тикланувчи энергия, озиқ-овқат хавфсизлиги, тиббиёт, сув ресурслари, янги материаллар ҳамда сейсмология каби устувор йўналишлардаги докторантларни қўллаб-қувватлашнинг янги тизими жорий этилади.

Шунингдек, илмий тадқиқотлар учун асбоб-ускуналар ва реагентлар харидига қўшимча маблағ ажратилиши режалаштирилмоқда.

Диссертация ҳимояси жараёнларидаги ортиқча бюрократик тартиб-таомиллар 50 фоизга қисқартирилади. Жумладан, кўплаб ҳужжатларни чоп этиш, авторефератларни катта ҳажмда тайёрлаш ва диссертацияларни қайта муҳокама қилиш каби талаблар бекор қилинади.

Бундан ташқари, “Лойиҳа доирасида илмий даража” ва “Амалий докторантура” дастурлари йўлга қўйилади. Ушбу тизим орқали PhD даражаси реал сектор корхоналари билан ҳамкорликдаги амалий лойиҳалар асосида олинади.

Президент илмий тадқиқотлар сифатини ошириш ва илм-фанни иқтисодиёт билан интеграция қилиш муҳимлигини таъкидлаб, мутасаддиларга тегишли топшириқлар берди.