Платформа хавфли маҳсулотлар савдосини етарлича назорат қилмагани учун 200 млн евро миқдорида жаримага тортилди.

Европа Иттифоқи Хитойнинг онлайн-маркетплейси Temu ни 200 миллион евро миқдорида жаримага тортди. Европа Комиссияси маълумотига кўра, платформа орқали хавфли болалар ўйинчоқлари, хавфсизлик талабларига жавоб бермайдиган зарядловчи қурилмалар ва бошқа ноқонуний маҳсулотлар сотилган.

Текширув натижаларига кўра, компания сотувга қўйилган товарлар билан боғлиқ хавфларни аниқлаш ва баҳолаш бўйича самарали тизим ярата олмаган. Шунингдек, истеъмолчилар хавфсизлигига таҳдид солувчи маҳсулотларнинг тарқалишига қарши етарли чоралар кўрилмагани қайд этилган.

Тергов деярли икки йил давом этган.

Temu фаолияти бўйича расмий текширув 2024 йил октябрида бошланган. Орадан бир неча ой ўтиб, Европа регуляторлари компания истеъмолчилар ҳуқуқларини ҳимоя қилиш ва товарлар хавфсизлиги бўйича талабларни бузган бўлиши мумкинлигини билдирган.

Ҳозирда Temu қарорга қарши чиқиб, жаримани номутаносиб деб баҳолаган ва ҳуқуқий чоралар кўришини маълум қилган.