Ўзбекистонда коррупцияга қарши курашни кучайтиришга қаратилган янги қонун Сенат томонидан маъқулланди. Унга кўра, пора олиш, пора бериш ёки пора олиш-беришда воситачилик қилганлик учун ҳукм қилинган шахсларни жазодан муддатидан илгари шартли равишда озод қилиш амалиёти бекор қилиниши кутилмоқда. Қонун билан Жиноят кодексига илк бор “коррупцияга оид жиноятлар” деган алоҳида тушунча ва уларнинг аниқ рўйхати киритилмоқда.

Бу эса ҳуқуқни қўллаш амалиётидаги турли талқинлар ва чалкашликларни бартараф этишга хизмат қилиши таъкидланмоқда.Шунингдек, хизмат мавқеидан фойдаланиб содир этилган фирибгарлик учун жавобгарлик ҳам кучайтирилади. Эндиликда бундай жиноят Жиноят кодексининг 168-моддаси тўртинчи қисмига ўтказилиб, 10 йилгача озодликдан маҳрум қилиш жазоси қўлланиши назарда тутилмоқда.

Мазкур ўзгаришлар коррупцияга оид жиноятлар учун жавобгарликнинг муқаррарлигини таъминлаш, жазоларнинг таъсирчанлигини ошириш ҳамда давлат бошқарувида очиқлик ва ҳалолликни мустаҳкамлашга қаратилган.