Коррупцияга қарши курашиш йўналишида Давлат хавфсизлик хизмати, Бош прокуратура ҳузуридаги Департамент ҳамкорлигида ўтказилган тезкор тадбирлар натижасида таълим тизимидаги ноқонуний ҳолатларга чек қўйилди.

Хусусан, Наманган вилояти Мактабгача ва мактаб таълими бошқармасининг шўба бошлиғи Тўрақўрғон туманида яшовчи фуқарони Наманган шаҳридаги умумий ўрта таълим мактабларидан бирига директор лавозимига ишга жойлаштириб қўйиш эвазига 10 минг АҚШ доллари талаб қилган. У сўралган пул маблағи ҳисобидан 8,5 минг АҚШ долларини ўз хизмат хонасида олган вақтида ашёвий далиллар билан ушланди. Аниқланишича, ушбу мансабдор шахс 2011 йилда Жиноят Кодексининг 168, 205, 209, 210 ва 227-моддалари (“Фирибгарлик”, “Ҳокимият ёки мансаб ваколатини суиистеъмол қилиш, “Мансаб сохтакорлиги”, “Пора олиш”, “Ҳужжатлар, штамплар, муҳрлар, бланкаларни ... эгаллаш, нобуд қилиш, уларга шикаст етказиш ёки уларни яшириш”) билан судланган бўлсада, ўз хатосидан тўғри хулоса чиқармаган. Бошқа ҳолатда эса Наманган шаҳридаги мактабгача таълим ташкилоти ходими давлат хусусий шерикчилигида 2 та мактабгача таълим ташкилоти ташкил этмоқчи бўлган тадбиркорга ўзининг мансабдор танишлари орқали мазкур туман Мактабгача ва мактаб таълими бўлими томонидан тегишли шартномаларни тасдиқлатиб бериш эвазига 2 минг АҚШ доллари олган вақтида ушланди. Сўнгра тезкор тадбир давом эттирилиб, ундан ушбу пул маблағини олганида Давлатобод тумани Мактабгача ва мактаб таълими бўлими бош мутахассисининг ноқонуний ҳаракатига чек қўйилди. Ҳозирда ҳар икки ҳолат бўйича мазкур шахсларга нисбатан жиноят ишлари қўзғатилиб, тергов ҳаракатлари олиб борилмоқда.

• ДХХ
• Коррупция
• Наманган