Гиёҳвандлик воситаларининг ноқонуний айланмасига қарши курашиш йўналишида Давлат хавфсизлик хизматининг Фарғона вилояти бўйича бошқармаси ва Ички ишлар органлари ҳамкорлигида ўтказилган тезкор тадбирда “Қўқон – Тошкент” йўналишида ҳаракатланаётган, Тошкент шаҳрида яшовчи 1995 йилда туғилган шахс бошқарувидаги Voyah русумли автомашина Наманган вилояти Поп туманидаги “Наманган” ЙПХ масканида тўхтатилиб, холислар иштирокида текширилди. Натижада, автомашина салонидаги ўриндиқ остида қора рангли целлофан пакет ичида соф оғирлиги 1 кг 178 гр “гашиш” моддаси ва 8 дона “Регапен” кучли таъсир қилувчи дори воситаси борлиги аниқланиб, процессуал тартибда расмийлаштирилди.

Маълум бўлишича, у ажал оғусини пойтахтдаги мижозларга сотиш мақсадида олиб кетаётган бўлган.

Ҳозирда унга нисбатан жиноят иши қўзғатилиб, “қамоқ” эҳтиёт чораси қўлланилди. Тергов ҳаракатлари олиб борилмоқда.

“Ҳурматли фуқаролар, кундалик ҳаётда гиёҳвандлик воситалари савдоси билан боғлиқ ҳолатларга дуч келсангиз ДХХнинг 1520 қисқа рақамига қўнғироқ қилиб, хабар беринг. Шахсингизнинг сир сақланиши кафолатланади”, – дейилади ДХХ хабарида.

• ДХХ
• Гиёҳвандлик
• JK
• Наманган
• ЙПХ