Жорий йилнинг 20 майдан 21 май кунига ўтар кечаси Самарқанд шаҳрида қозоғистонлик сайёҳларга куч ишлатиб, уларга “электрошокер” қўллаган ППХ ходимларига нисбатан хизмат текшируви белгиланди. Бу ҳақда ИИВ Матбуот котиби Шохруҳ Ғиёсов маълум қилди.

Ғиёсовга кўра, ўша куни тунги хизматга жалб этилган Самарқанд шаҳар ИИБ Патруль-пост хизмати ходимлари, Мирзо Улуғбек кўчасида қўшни мамлакатдан Ўзбекистонга меҳмонга келган сайёҳларни шахсини текшириш жараёнида қўпол муносабатда бўлиб, хизмат вазифасини ва махсус-техник воситаларни қўллаш ваколатини суиистеъмол қилганлар.

Ҳозирда мазкур ҳолат юзасидан ИИВ Шахсий хавфсизлик хизмати томонидан прокуратура органлари билан ҳамкорликда хизмат текшируви ўтказилмоқда.

“Текширув якунига кўра, қонунчиликка зид ҳаракат қилган барча ходимларнинг ҳамда фаолиятга масъул раҳбарларининг хизматдан бўшатилиши ва жавобгарлик масаласи кўриб чиқилади”, – дейди ИИВ Ахборот хизмати раҳбари Ғиёсов.

• Ғиёсов
• ИИВ
• Самарқанд
• Сайёҳ