Жанубий Кореянинг “Samsung” компанияси “Galaxy Z Fold 5” ва “Galaxy Z Flip 5” учун янги авлод илгакларини яратиш устида ишламоқда. У смартфонларни чангдан бутунлай ҳимоя қилади. Бу ҳақда ишончли инсайдерлар Twitter’да хабар беришган.

Қайд этилишича, янги илгак телефоннинг икки ярмини маҳкамроқ ёпишга имкон беради. Шу сабабдан чанг ва бошқа майда заррачалардан сақлайди. Бундан ташқари, у экрандаги бурманинг кўринишини камайтиради ва ёпилганда смартфонни аввалгиларидан ингичка қилиб қўяди.

Аввалроқ, инсайдерлар томонидан “Galaxy Z Fold 5” ўзидан олдинги “Galaxy Z Fold 4” смартфонидан 10 грамм енгилроқ бўлиши хабар қилинган эди. Шундай қилиб, янги қурилманинг оғирлиги тахминан 250 грамм бўлиши мумкин.

Манбанинг таъкидлашича, ҳозирча бу фақат миш-мишлар холос. Аммо агар Корея корпорацияси ҳақиқатан ҳам ўз смартфонларига ушбу янги технологияни жорий қилса, бу узоқ вақтдан бери фойдаланувчиларни янги технологиялар билан хурсанд қилмаётган чиғаноқсимон қурилмалар бозори учун туртки бўлиши мумкин.

Хабарларга кўра, “Galaxy Z Flip 5” ва “Galaxy Z Fold 5” 2023 йилнинг август ёки сентябрь ойида премьера қилинади. Шунингдек, “Galaxy Watch 6” серияси ҳам ушбу моделлар билан бирга сотувга чиқарилиши режалаштирилган.

Бундан ташқари, компания 2025 йилга бориб ўз маҳсулотларини қадоқлашда пластик материаллардан фойдаланишдан воз кечмоқчи.

Эслатиб ўтиш мумкин, “Samsung” сўзи корейс тилида “уч юлдуз” деган маънони англатади. Эҳтимол, бу исм компания асосчиси Ли Бён Чулнинг уч нафар ўғли билан боғлиқ бўлиши мумкин, уларнинг энг кичиги Ли Гонг Хи компанияни 1987 йилда барча Шарқий мерос анъаналарини бузган ҳолда эгаллаб олган, унга кўра тўнғич ўғли оила мулкининг катта қисмини мерос қилиб олиши керак бўлган. “Samsung”нинг даромади 2019 йилда 305 миллиард доллар, 2020 йилда 107 миллиард доллар ва 2021 йилда 236 миллиард долларни ташкил қилган. Компаниянинг 2022 йилги молиявий ҳисобот натижалари ҳали эълон қилинмаган.

• Samsung
• Smartfon
• технология