Яқинда ижтимоий тармоқларда Марказий Осиёдан борган меҳнат муҳожирлари Россияда таҳқирлангани акс этган лавҳалар кенг тарқалиб, жамоатчиликнинг эътирозларига сабаб бўлган эди. Ушбу воқеага Ўзбекистон журналистика ва оммавий коммуникациялари университети ректори, таниқли журналист, телебошловчи, сиёсатшунос, “политология” фанлари доктори ва профессор – Шерзодхон Қудратхўжа муносабат билдирди.

“Москвадаги сўнгги воқеалар — ҳужжатларида муаммоси бор мигрантларни ҳақоратлаш, уларни тепиш, хорлаш ҳолатлари — афсуски, одатий ҳолга айланмоқда. Ўзбек ёшлари энг оғир меҳнатларни бажарса-да, шунга муносиб муомала кўрмаяпти.

Ўзбекистонда ишсизлик муаммоси бор, лекин бу ёшларни Россияга юбориш ечим эмас. Улар у ерда инсон сифатида қадрланмайди. Биз ёшларимизни тил ўрганишга, яхши ҳунар эгаллашга ва ривожланган давлатлар — Олмония, БАА, Япония, Жанубий Корея каби мамлакатларга йўналтиришимиз зарур.

Ҳозир Ўзбекистонга ҳатто Ҳиндистон ва Бангладешдан ишчилар келяпти, чунки ўзимизникилар ички ишларга қизиқмай қолишган. Бу ҳам оғриқли, лекин ўзга юртда таҳқирланишдан афзалроқ.

Россия расмийларидан бундай таҳқирлашларни тўхтатишни талаб қиламиз. Чунки ўзбеклар тарихда кўп миллатга паноҳ, ғамхўрлик ва меҳр кўрсатган. Бундай муносабат бизга нисбатан инсофсизлик, балки нацизмнинг ўзи”, – деган у.

• Фикр
• Россия
• Sherzodxon Qudratxo‘ja
• муҳожир