6–8-октабр кунлари Туркманистоннинг Аваза шаҳрида Мустақил Давлатлар Ҳамдўстлигининг уруғчилик масалалари бўйича Ҳукуматлараро мувофиқлаштирувчи кенгашининг 27-йиғилиши ва халқаро конференция бўлиб ўтди. Унда Ўзбекистон Республикаси Президентининг аграр ривожланиш масалалари бўйича давлат маслаҳатчиси Шуҳрат Ғаниев бошчилигидаги Ўзбекистон делегацияси иштирок этди.

Йиғилишда МДҲ давлатлари ўртасида аграр соҳадаги ҳамкорликни ривожлантириш, селекция ва замонавий уруғчилик тизимларини такомиллаштириш, 2027–2028 йилларга мўлжалланган қишлоқ хўжалиги экинлари уруғлари ва кўчатларини давлатлараро ихтисослаштириш ҳамда етказиб бериш масалалари муҳокама қилинди.

Тадбир давомида иқлим ўзгаришига мослашиш, қурғоқчилик ва касалликларга чидамли, юқори ҳосилдор навларни яратиш ва жорий этиш, уруғчилик соҳасини рақамлаштириш ҳамда сифат назоратини кучайтириш бўйича тажриба алмашилди. Шунингдек, уруғчилик ва селекция соҳасидаги давлатлараро интеграцияни мустаҳкамлаш, миллий уруғчилик тизимларини ривожлантириш ҳамда ўзаро тажриба алмашишга эътибор қаратилди.

Шуҳрат Ғаниев Туркманистон Вазирлар Маҳкамаси раисининг ўринбосари Тангригули Атахаллиев билан юқори ҳосилдор қишлоқ хўжалиги экинлари уруғларини экспорт қилиш, янги навларни ўзаро синовдан ўтказиш ва илғор тажрибаларни алмашиш масалаларини муҳокама қилди. Тожикистон Республикаси Бош вазирининг ўринбосари Зиёзода Сулаймон Ризойи билан эса уруғчилик соҳасидаги ҳамкорликнинг амалий механизмлари, Ўзбекистонда эришилган қишлоқ хўжалиги ютуқлари ва янги агротехнологияларни Тожикистонга трансфер қилиш масалалари келишиб олинди.

Тадбирда Ўзбекистоннинг МДҲ мамлакатлари билан уруғчилик соҳасидаги ҳамкорликни ривожлантиришга қўшаётган ҳиссаси ҳам эътироф этилди. Шуҳрат Ғаниевга давлатлараро алоқаларни ривожлантиришга қўшган ҳиссаси учун МДҲ Ҳукуматлараро мувофиқлаштирувчи кенгашининг Фахрий ёрлиғи топширилди.

Шунингдек, «Узбек сеэдс» миллий бренди остида маҳаллий уруғлик материаллари экспортини кенгайтириш, уруғчилик тизимини халқаро стандартларга мувофиқлаштириш ва рақамли технологиялардан фойдаланиш истиқболлари муҳокама қилинди.