Булунғур туманида фаолият юритувчи “Бухгалтерия маркази” давлат муассасаси ҳисобчиси қишлоқ хўжалиги маҳсулотлари етиштиришга ихтисослашган фермер хўжалигига нисбатан ҳисобланган 150 млн сўмлик солиқ қарздорлигини ўзининг мансабдор таниши орқали камайтириб беришни ваъда қилиб, хўжалик раҳбаридан дастлаб 3 млн сўм олган.

Сўнгра у фермердан қўшимча тарзда 15 млн сўм талаб қилиб, ушбу пул маблағини Булунғур туман солиқ инспекцияси бошлиғи ўринбосари билан бирга олаётган вақтида ДХХ ва ИИВ ходимлари томонидан ашёвий далиллар билан ушланди.

2025 йилда Каттақўрғон тумани ҳокими ўринбосари лавозимида ишлаган шахс ўз хизмат мавқеидан фойдаланиб, 1986 йилда туғилган фуқарони туман тиббиёт бирлашмасига ишга жойлаштириб қўйиш эвазига 14 млн сўм олган. Бироқ у берган ваъдасини бажармаган.

ДХХ ва ИИВ ходимлари томонидан ўтказилган тезкор тадбирда ҳозирда собиқ ҳоким ўринбосари бўлган мазкур шахс илгари олган пул маблағи ҳисобидан 1000 АҚШ долларини қайтариб бераётган вақтида унинг ноқонуний ҳаракати фош этилди.

Ҳозирда ҳар икки ҳолат юзасидан мазкур шахсларга нисбатан жиноят ишлари қўзғатилиб, тергов ҳаракатлари олиб борилмоқда.