Фарғона шаҳрида таркибида 15, 18 ва 20 ёшли йигитлар бўлган уюшган жиноий гуруҳ фаолиятига чек қўйилди. Бу ҳақда вилоят ИИБ матбуот хизмати маълум қилди.

Аниқланишича, аввал Жиноят кодексининг 97-моддаси (қасддан одам ўлдириш) билан судланган 2004 йилда туғилган шахс жиноий гуруҳ тузиб, унинг фаолиятини бошқариб келган.

Маълум қилинишича, гуруҳ аъзолари Қирғули даҳасидаги мактаб ўқувчилари ва фуқароларни қўрқитиб, тан жароҳати етказиш билан таҳдид қилган. Улар телефон ва бошқа моддий қимматликларни ўғрилик, фирибгарлик ҳамда талончилик йўли билан қўлга киритган.

Шунингдек, жиноий гуруҳ таркибига бошқа шахсларни жалб қилишга ҳам мунтазам уринишлар бўлгани қайд этилди.

Фарғона вилояти ИИБ ҳамда ДХХ ходимлари ҳамкорлигида ўтказилган тезкор тадбир давомида гуруҳ аъзолари қўлга олиниб, вақтинча сақлаш ҳибсхонасига жойлаштирилган.

Улардан уяли алоқа воситалари, гашиш моддаси ва совуқ қурол ашёвий далил сифатида олинган. Ҳозирда терговга қадар текширув ҳаракатлари давом этмоқда.