18 май куни Ўзбекистон Президенти Администрацияси раҳбари Саида Мирзиёева Лондонда АҚШ Президенти Дональд Трампнинг Жанубий ва Марказий Осиё бўйича махсус вакили, элчи Сержио Гор билан учрашди. Бу ҳақда у ўзининг Telegram каналида маълум қилди.

“Лондонда АҚШ Президентининг Жанубий ва Марказий Осиё бўйича махсус вакили, элчи Сержио Гор билан учрашганимдан жуда мамнун бўлдим. Унинг биржа савдоларининг очилиш маросимида ёнимизда туриб, қўллаб-қувватлагани биз учун алоҳида аҳамият касб этди”, — деди Ўзбекистон Президенти Администрацияси раҳбари.

Унинг билдиришича, учрашув давомида томонлар ўзаро алоқаларни янада мустаҳкамлаш истиқболларини муҳокама қилиб, олдинга қўйиладиган аниқ қадамлар бўйича келишувга эришган.

Эслатиб ўтамиз, аввалроқ Саида Мирзиёева Лондон фонд биржасида мамлакат акцияларининг тарихда илк бор халқаро оммавий савдога чиқарилиш маросимида иштирок этгани ҳақида хабар берилган эди. Шундан сўнг у сиёсатчилар ва молиявий ташкилотлар раҳбарлари, жумладан Буюк Британия Бош вазири Кир Стармернинг инвестициялар бўйича маслаҳатчиси Варун Чандра, Марказий Осиё ва Озарбайжон бўйича савдо вакили лорд Жон Олдердейс, Franklin Templeton бош ижрочи директори Женни Жонсон ҳамда Лондон фонд биржаси бош ижрочи директори Жулия Энн Хоггетт билан учрашувлар ўтказди.