Президент фармонига мувофиқ, суд тизимида коррупсиявий хавф-хатарларни эрта аниқлаш ва уларнинг олдини олишга қаратилган янги механизмлар жорий этилмоқда. Шу мақсадда Олий суд таркибида Комплаенс назорати хизмати ташкил этилади.Мазкур хизмат суд аппарати ходимлари фаолиятидаги коррупсиявий хавфларни аниқлаш ва баҳолаш, манфаатлар тўқнашувининг олдини олиш ҳамда қонунчилик ва касб этикаси талабларига риоя этилишини мониторинг қилиш билан шуғулланади. Фармонга кўра, суд аппарати ходимлари ва уларнинг оила аъзоларига тегишли даромадлар ҳамда мол-мулкни декларация қилиш тизими жорий этилади.

Бу эса манфаатлар тўқнашуви ва коррупсиявий хавфларни дастлабки босқичда аниқлаш имконини кенгайтиради.Шунингдек, суд тизимига ишга қабул қилинаётган номзодларнинг касбий ва шахсий фазилатлари, ҳалоллиги ҳамда коррупцияга қарши барқарорлиги баҳоланади. Ишга қабул қилиш жараёнлари очиқ танлов асосида, меритократия тамойилларига мувофиқ амалга оширилади.

Бундан ташқари, коррупция ва бошқа қонунбузилишлар ҳақида хабар берган ходимларни ҳимоя қилиш механизмлари кучайтирилади ҳамда фуқаролар учун хавфсиз мурожаат каналлари яратилади.Янги тартибларнинг асосий мақсади — суд тизимида шаффофлик, ҳалоллик ва қонунийликни янада мустаҳкамлаш, фуқароларнинг одил судловга бўлган ишончини оширишдан иборат.