Сурхондарё вилоятида Давлат хавфсизлик хизмати ва Ички ишлар бошқармаси ҳамкорлигида ўтказилган тезкор тадбирлар давомида катта миқдордаги гиёҳвандлик воситаларининг ноқонуний айланмаси фош этилди.

Дастлабки маълумотларга кўра, Афғонистон ҳудудидан контрабанда йўли билан жами 25 кг 444 грамм “опий” ва 11 кг 86 грамм “гашиш” мамлакатга олиб кирилган. Жами миқдор 37 килограммдан ортиқни ташкил этади.Тергов маълумотларида қайд этилишича, мазкур наркотик воситалар яширин йўллар орқали Ўзбекистонга олиб кирилиб, кейинчалик Самарқанд шаҳрига етказилган. Уларни қабул қилиб олган вақтида 1989 ва 1997 йилда туғилган икки нафар маҳаллий фуқаро ҳамда 1993 ва 1995 йилда туғилган икки нафар хорижлик шахс қўлга олинган.Шунингдек, бошқа бир тезкор тадбир давомида Термиз халқаро савдо марказида 1955 ва 2001 йилда туғилган икки нафар Афғонистон фуқароси 1 кг 76 грамм “опий” моддасини 5 минг АҚШ долларига сотаётган вақтида ушланган

.Мутасаддилар маълумотига кўра, айрим ҳолатларда гиёҳванд моддаларни яширин олиб киришда “жонли контейнер” усули ҳам қўлланган.Ҳозирда барча гумонланувчиларга нисбатан Жиноят кодексининг тегишли моддалари бўйича жиноят ишлари қўзғатилган ва “қамоқ” эҳтиёт чораси қўлланилган. Тергов ҳаракатлари давом этмоқда.Ҳуқуқни муҳофаза қилувчи органлар фуқароларни гиёҳвандлик воситалари билан боғлиқ ноқонуний ҳолатларга бефарқ бўлмасликка ва 1520 ишонч рақамига хабар беришга чақирмоқда.