Бугун Ўзбекистон нафақат Марказий Осиёнинг, балки кенг Евроосиё маконининг энг фаол инвестициявий майдонларидан бири сифатида эътироф этилмоқда. Бунга Тошкент халқаро инвестиция форумининг йилдан-йилга ортиб бораётган нуфузи ва унда қатнашаётган халқаро меҳмонлар сони яққол мисол бўла олади.Жорий йилги форум ўз кўлами билан аввалги натижаларни ортда қолдирди. 

Тадбирда 10 минг 600 нафардан ортиқ иштирокчи қатнашган бўлса, уларнинг 4 мингдан зиёди дунёнинг 102 мамлакатидан ташриф буюрган хорижий инвесторлар, бизнес вакиллари ва халқаро ташкилотлар раҳбарларидан иборат бўлди.Форумда Германия Президенти Франк-Валтер Штайнмаер, Албания Президенти Байрам Бегай каби давлат раҳбарлари, шунингдек Россия, Беларус, Озарбайжон, Қозоғистон, Қирғизистон ва Тожикистон ҳукуматлари раҳбарлари иштирок этди. Бундан ташқари, Жаҳон банки, Осиё тараққиёт банки, Халқаро молия корпорацияси, Европа тикланиш ва тараққиёт банки ҳамда бошқа йирик халқаро молиявий институтлар вакиллари ҳам Тошкентда жам бўлди.

Форумнинг энг муҳим жиҳатларидан бири шундаки, унинг иштирокчилари сунъий рағбатлантириш ёки махсус имтиёзлар асосида эмас, балки Ўзбекистон иқтисодиётининг истиқболига бўлган ишонч туфайли ташриф буюрмоқда. Хорижий инвесторлар ва меҳмонлар сафар билан боғлиқ барча харажатларни мустақил равишда қоплаган ҳолда форумда қатнашаётгани мамлакатнинг халқаро майдондаги инвестициявий жозибадорлиги ортиб бораётганини кўрсатади.Сўнгги йилларда амалга оширилаётган иқтисодий ислоҳотлар, бизнес юритиш учун яратилаётган қулай шароитлар, инвесторлар ҳуқуқларининг мустаҳкам ҳимоя қилинаётгани ҳамда очиқ иқтисодиёт тамойилларининг изчил жорий этилиши Ўзбекистоннинг халқаро рейтинг ва баҳолардаги мавқеини сезиларли даражада яхшилади.

Бугунги кунда Тошкент халқаро инвестиция форуми нафақат инвестицияларни жалб қилиш майдони, балки минтақавий ҳамкорлик, иқтисодий интеграция ва йирик лойиҳаларни муҳокама қилувчи муҳим халқаро платформага айланмоқда. Турли давлатлар раҳбарлари ва йирик молиявий институтлар вакилларининг бир майдонда жам бўлиши Ўзбекистоннинг минтақадаги стратегик ўрни тобора мустаҳкамланаётганидан далолат беради.Мутахассислар фикрича, форум якунлари бўйича эришиладиган келишувлар ва имзоланадиган инвестиция битимлари мамлакат иқтисодиётининг янги ўсиш нуқталарини шакллантиришга хизмат қилади. Бу эса Ўзбекистоннинг нафақат инвестицияларни жалб қилувчи давлат, балки минтақадаги иқтисодий жараёнларни бирлаштирувчи ва ривожланишга йўналтирувчи марказ сифатидаги ролини янада кучайтиради.