Ижтимоий тармоқларда Таиланд Қироллигининг Пхукет оролида содир бўлган катер ҳалокати ва ундаги Ўзбекистон Республикаси фуқаролари ҳақида тарқалган хабарлар юзасидан ТИВ матбуот котиби Ахрор Бурханов маълумот берди.

Ҳодиса 11 январь куни содир бўлган. Тарқалган хабарларда катер балиқчи траулери билан тўқнашиши оқибатида ағдарилиб, чўкиб кетгани ва унда 18 ёшли россиялик аёл ҳалок бўлгани айтилган. Шунингдек, яна 23 нафар россиялик сайёҳ касалхонага ётқизилган.

Бортда 3 нафар Ўзбекистон фуқароси ҳам бўлган. Ҳалокатда уларнинг 2 нафари енгил тан жароҳати олиб, маҳаллий шифохонага ётқизилган. Жабрланган фуқаролар тўлиқ соғайган ва белгиланган тартибда шифохонадан чиқарилган.

Шу билан бирга, жабрланганларнинг барча тиббий ва бошқа зарур харажатлари катерга эгалик қилувчи компаниянинг суғурта маблағлари ҳисобидан тўлиқ қопланган.

Вазият юзасидан Пхукет ва Краби провинциялари полицияси тергов ишларини ташкиллаштирган, унинг сабаблари ўрганилмоқда. Ўзбекистон Республикасининг Бангкок шаҳридаги Бош консулхонаси маҳаллий ҳуқуқни муҳофаза қилувчи органлар ҳамда соғлиқни сақлаш муассасалари билан доимий алоқада бўлиб келгани айтилди.

• Баёнот
• Жароҳатлар
• Ўзбекистонлик
• ТИВ
• Tailand
• fuqaro