Тошкент вилояти Зангиота туманида 1,2 тонна сифатсиз гўшт маҳсулотлари савдосига чек қўйилди. Бу ҳақда вилояти ИИББ ахборот хизмати маълум қилди.

Маълум қилинишича, вилоят ИИББ карантин тадбирларини таъминлаш бўлинмаси ва Прокуратура департаменти ходимлари билан ҳамкорликда Зангиота туманида ўтказилган тадбир давомида туманнинг Гулбоғ маҳалласида жойлашган 1993 йилда туғилган фуқаро Б.Т.га (қассоб) тегишли (ноқонуний) кушхона холислар иштирокида кўздан кечирилган.

Текшириш давомида кушхонада санитария талабларига жавоб бермайдиган ҳолатда сақланаётган, инсон ҳаёти ва соғлиғи учун хавфли бўлган (текширув хулосаси билан) 1 тонна 271 кг гўшт маҳсулотлари далилий ашё сифатида ҳужжатлаштирилиб олинган.

Мазкур ҳолат юзасидан фуқаро Б.Т. ва у ердаги бошқа фуқароларга нисбатан Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) билан жиноят иши қўзғатилиб, тергов ҳаракатлари олиб борилмоқда.

• Гўшт
• ИИБ
• Iste'molga yaroqsiz
• Прокуратура
• Qassob
• Toshkent viloyati