Тошкент шаҳрида ўқувчиларнинг мактабга қандай қатнаши ва мактаб автобусларига эҳтиёж мавжудлиги ўрганилмоқда. Бу ҳақда Йўл ҳаракатини ташкил этиш маркази маълум қилди.

Марказ томонидан 5-сентябрь куни сўровнома ўтказилган. Ундан кўзланган мақсад пойтахтда мактаб автобусларини йўлга қўйиш имкониятларини ўрганиш, уларга бўлган эҳтиёжни аниқлаш ва заруратдан келиб чиқиб тизимни жорий этиш масаласини кўриб чиқишдан иборат.

Сўровномада ота-оналардан қуйидаги маълумотларни кўрсатиш сўралмоқда:

яшаш манзили;

фарзанди таҳсил олаётган мактаб ва синфи;

мактабга чиқиш вақти;

фойдаланиладиган транспорт тури;

мактаб автобусига эҳтиёж бор ёки йўқлиги.

Оилада бир нечта фарзанд бўлса, уларнинг маълумотлари алоҳида киритилади.

Марказ маълумотларига кўра, сўровнома давомида шахсий маълумотлар йиғилмайди. Олинган натижалар фақат умумий таҳлил ва мактаб қатновини ташкил этиш бўйича қарорлар қабул қилиш учун фойдаланилади.

Қайд этилишича, ўқув йили бошланиши билан мактаблар ва бошқа таълим муассасалари атрофида транспорт ҳамда пиёдалар ҳаракати сезиларли даражада ортади. Бу айрим кўчаларда тирбандликлар юзага келишига сабаб бўлиши мумкин.

Аввалроқ, 2025-йил август ойида Халқ депутатлари Тошкент шаҳри кенгаши сессиясида пойтахтда мактаб автобусларини йўлга қўйиш имкониятлари муҳокама қилинган эди.

Шунингдек, “Ўзбекистон — 2030” стратегиясида олис ва чекка ҳудудларда жойлашган 715 та мактаб ўқувчилари учун бепул мактаб автобусларини йўлга қўйиш белгиланган.