Яқин Шарқдаги сўнгги воқеалар муносабати билан Қатарда бўлиб турган 600 га яқин Ўзбекистон фуқароси орасида жабрланганлар аниқланмади. Бу ҳақда Ўзбекистоннинг Доҳадаги элчихонаси хабар бермоқда.

Маълум қилинишича, 28 февраль куни Қатар ҳаво ҳудудининг вақтинча ёпилиши оқибатида Тошкентга қайтаётган 48 нафар ўзбекистонликлар Доҳа аэропортида қолиб кетган. Авиакомпаниялар фавқулодда вазият сабаб йўловчиларни меҳмонхона билан таъминлай олмаган бир шароитда, элчихона ходимлари зудлик билан аэропортга етиб борган. Музокаралар натижасида фуқаролар, жумладан, ижтимоий тармоқлар орқали ёрдам сўраган ватандошлар вақтинчалик меҳмонхоналарга жойлаштирилган.

“Қатар ҳаво ҳудуди очилиб, парвозлар тикланиши билан фуқароларимизнинг Ватанга хавфсиз қайтиши таъминланади. Вазият элчихонанинг доимий назоратида бўлиб, йўловчилар рўйхати мунтазам янгилаб борилмоқда”, – дейилади хабарда.

Шунингдек, дипломатик ваколатхона ўзбекистонликларни ваҳимага тушмасликка, фақат расмий манбаларга таянишга ҳамда хавфсизлик юзасидан одамлар гавжум жойлардан сақланиб, маҳаллий қонун-қоидаларга амал қилишга чақирган.

Мурожаат учун элчихона консули Отабек Муратов ( +974 5141 1001)билан боғланиш айтилган.

• Аэропорт
• Konsullik
• Ўзбекистонлик
• Қатар
• fuqaro