Bloomberg нашри хабарига кўра, Доналд Трамп маъмурияти Ғазо сектори бўйича халқаро “Тинчлик кенгаши”да доимий ўрин олишни истаган давлатлардан камида 1 млрд доллар миқдорида бадал тўлашни талаб қилмоқда. Ушбу маблағни нақд шаклда тўлаган мамлакатлар учун аъзолик муддати бўйича чеклов қўлланилмаслиги қайд этилган.

Ҳужжатга мувофиқ, Доналд Трамп Кенгашнинг биринчи раиси бўлади ва аъзоликка ким қабул қилиниши бевосита унинг қарорига боғлиқ бўлади. Ҳар бир аъзо давлат битта овозга эга бўлади, қарорлар кўпчилик овози билан қабул қилинади, бироқ уларнинг барчаси якунда раис томонидан тасдиқланиши шарт. Оддий тартибда аъзолик муддати уч йилдан ошмаслиги керак, аммо 1 млрд доллардан ортиқ бадал тўлаган давлатлар бу талабдан мустасно бўлади.

Bloomberg'нинг қайд этишича, Кенгашнинг расмий мақсади — можаро бўлган ёки можаро хавфи сақланиб қолаётган ҳудудларда барқарорликни таъминлаш, тинчликка кўмаклашиш ва “ишончли ҳамда қонуний” бошқарувни тиклашдан иборат. Бироқ танқидчилар бу ташаббусни Трамп томонидан кўп йиллар давомида танқид қилиб келинган БМТга муқобил тузилма яратиш уриниши сифатида баҳоламоқда.

Трамп Ғазо бўйича Тинчлик кенгашини тузишини 16 январь куни расман эълон қилди. Ушбу ғоя Ғазо учун таклиф этилган тинчлик режасининг бир қисми бўлиб, унда халқаро кучларни жойлаштириш ҳам назарда тутилган. Шу куни Оқ уй Кенгашнинг ижроия қўмитаси таркибини ҳам маълум қилди: унга етти киши, жумладан АҚШ давлат котиби Марко Рубио, Трампнинг махсус вакили Стив Уиткофф, президентнинг куёви Жаред Кушнер ва Британиянинг собиқ бош вазири Тони Блер киритилган.

Ражаб Тоййиб Эрдўған маъмурияти маълум қилишича, Трамп Туркия раҳбарига Кенгаш фаолиятида “таъсисчи аъзо” сифатида иштирок этиш таклифи билан мактуб йўллаган.

Исроил бош вазири Бинямин Нетаняху эса кенгаш ижроия қўмитаси таркиби Исроил билан келишилмагани ва мамлакат сиёсий позициясига зид эканини билдирган.

• АҚШ
• Трамп
• shartnoma