Кўпчилик инсонлар учун туз оддий зиравор, холос. Бироқ тажрибали уй бекалари ундан қандай фойдаланиш (кир ювиш, доғларни кетказиш)ни яхши билишади. Бундан ташқари, оддий туз касалликни даволаш воситасига ҳам айланиши мумкин. Бугун биз туздан сиз билмайдиган тарзда фойдаланиш йўлларини ўргатамиз.
Газ духовкасидаги нохуш ҳид
Агар духовкада аввал тайёрланган таомнинг ўткир ҳиди сақланиб қолган бўлса, долчинли туз ёрдам беради. Долчин ва тузни духовка патнисларига сахийлик билан сепинг ва қиздириб, бир неча дақиқа кутинг. Жараёндан сўнг, тузли аралашмани чиқинди челагига ағдаринг, духовкани эса яхшилаб артиб юборинг.
Кумуш тақинчоқни тозалаш
Сирка ва туз аралашмаси кумушни тозаловчи энг яхши восита ҳисобланади. Кумушдан ясалган тақинчоқ ёки қошиқ-санчқиларни шу суюқликда 15-20 дақиқа ивитиб қўйиб, қуруқ, юмшоқ мато билан артинг ва оқиб турган сувда чайинг. Бироқ қорайиб қолган кумуш тақинчоқни бу тарзда тозалаб бўлмайди.
Кир ювиш
Агар сиз рангли кийимларни аралаштириб ювмоқчи бўлсангиз, сувга озгина йирик туз қўшиб юборинг. Шунда кирларнинг тиниқ ранги униқиб қолмайди.
Тиш оғриғи
Бувиларимиз авжига чиққан тиш оғриғини бир стакан сувга икки ошқошиқ туз қўшиб чайиш орқали қолдирган экан. Айни шу аралашма билан томоқ ва оғиз бўшлиғи касалликларини (стоматитдан ташқари) ҳам даволаш мумкин.
Оёқни ванна қилиш
Кўп терлайдиган оёқларни тузли ванна ёрдамида даволаш мумкин. Кечқурун, уйқудан аввал оёғингизни 10-15 дақиқа тузли сувга тиқиб туринг. Бу муолажани ҳар куни такрорлаш мумкин. Туз терини қуритиб, ёғ безлари фаолиятини сусайтиради.
Тузли скраб
Юқорида айтиб ўтганимиздек туз терини қуритиб, ундаги ўлган ҳужайраларни чиқариб ташлашга ёрдам беради. Демак, ундан ажойиб скраб тайёрлаш мумкин. Бундай скрабни ҳосил қилиш учун майда тузга лимон шарбати ва зайтун ёғи қўшилади. Танага самарали скраб тайёрлаш учун эса бироз қайта ишланган қаҳва қуйқасига туз, кокос ёки зайтун ёғи қўшиш лозим.
Қувурдан сув кетмай қолса
Агар қўлингизда қувурни тозалаш учун бирор восита бўлмаса, тиқинларни оддий туз ёрдамида ҳам кетказиш мумкин. Шунчаки қувур оғзига икки қошиқ туз сепиб, орқасидан қайноқ сув қуйиб юборинг. Икки дақиқадан сўнг сув кетиши яхшиланади.
Пол ва ойналарни ювиш учун
Табиий воситалардан фойдаланадиганлар тузнинг тозаловчи ва дезинфекциялаш хусусияти ҳақида яхши билишади. У ташқи юзани тозалаш билан бирга хона ҳавосини ҳам мусаффолаштиради. Кимёвий воситаларга аллергияси борлар ва ёш болали оналарга пол ва ойналарни туз билан тозалаш тавсия этилади. Шунчаки 2 ошқошиқ тузни уч литр сувга солиб, тозалашга киришинг.
Дазмол остидаги доғ
Туз ёрдамида дазмол остида қолган доғни осонликча кетказиш мумкин. Бунинг учун йирик тузни мато устига сепиб, дазмолни бир неча бор устидан юргизинг.
Ёғли товани тозалаш
Жудаям ёғли товани тозаламоқчи бўлсангиз, туз сизга ёрдам беради. Уни това тубига қалин қилиб сепинг ва озгина сув қўшиб, оловда 5-10 дақиқа ушланг. Кейин эса оқиб турган иссиқ сувда осонлик билан чайиб юборишингиз мумкин.
Тахтакач кирланганда
Тахтакач унда тўғралган барча маҳсулотнинг ҳидини ўзига олади. Шу боис уларни вақти-вақти билан тозалаб туриш лозим. Бунинг учун туз ва лимондан фойдаланинг. Бир бўлак лимон бўлаги билан тахтакач устига сепилган тузни ишқалаб чиқинг. 10-15 дақиқа қолдириб, сўнг ювиб ташланг.
Чумолиларга қарши курашиш
Қўл остингизда ҳашаротларга қарши курашадиган бирор восита бўлмаган пайтда сиз оддийгина туз ёрдамида чумолиларга қарши курашишингиз мумкин. Тузни уялар олдига, токча, бурчак-бурчакларга сепиб чиқинг.
Тухум ёрилиб кетса
Тухумларни тахлаётганингизда ерга тушиб, бўлиниб кетдими? Устига дарҳол туз сепиб, 5 дақиқага қолдиринг, кейин қуюқ массани йиғиштириб олиш осонлашади.
Бегона ўтларни тозалаш учун
Туз фақатгина ошхонада эмас, томорқада ҳам яхшигина ёрдам беради. Унинг ёрдамида ҳатто энг қалин ўтларни ҳам тозалаш мумкин. Дастлаб ўтлар устига 9 фоизли сирка қуйиб чиқинг ва устидан туз ҳам сепинг. Энг муҳими, меъёридан ошириб юбормаслик.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!