Россиядаги энг йирик нефтьни қайта ишлаш заводларидан бири — “Лукойл-Нижегороднефтеоргсинтез” Украина дронлари ҳужумидан сўнг ишлаб чиқариш қувватининг ярмидан кўпроғини йўқотди. Бу ҳақда Reuters хабар берди.

Аввалроқ Россиянинг Нижегород вилояти, Кстово шаҳридаги заводга дронлар орқали ҳужум уюштирилганди.

Зарба оқибатида корхонанинг асосий AVT-6 нефтьни қайта ишлаш қурилмаси фаолияти тўхтатилган. Ушбу ускуна завод умумий қувватининг 53 фоизини таъминлаган ҳамда кунига 25,7 минг тонна нефтьни қайта ишлаш имкониятига эга бўлган.

“Лукойл-Нижегороднефтеоргсинтез” Россиядаги тўртинчи йирик нефтьни қайта ишлаш заводи ҳисобланади. Корхона йилига 16 миллион тонна нефтьни қайта ишлаш қувватига эга бўлиб, мамлакатдаги энг йирик бензин ишлаб чиқарувчилардан бири саналади.

Завод сўнгги икки ой ичида иккинчи бор дрон ҳужумига учради. Жорий йилнинг 5 апрель куни ҳам корхонага зарба берилганди. Ўшанда завод фаолияти вақтинча тўхтатилгани маълум қилинган.

Украина дронлари ҳужумлари сабаб Россиянинг марказий ҳудудларидаги қатор йирик нефтьни қайта ишлаш заводлари ишлаб чиқаришни қисқартириш ёки вақтинча тўхтатишга мажбур бўлмоқда.