Бугун, 30 март куни “Ягона умумреспублика процессинг маркази” МЧЖ UzCard пластик карталарини банклар мижозларига бир зумда чиқариб бериш имконини берувчи янги хизматни тақдим этди.

Қайд этилишича, янги турдаги UzCard карталари NFC технологияси орқали контактсиз тўловларни қўллаб-қувватлайди ҳамда бу карталарнинг рақамлари бўрттирилган шаклда бўлади. Янги турдаги карталарга бағишланган тадбир давомида Entrust компаниясининг “Entrust Datacard 840CE” моделдаги ускунаси ёрдамида рақамлари бўрттирилган янги турдаги карталарни чоп этиш жараёни намойиш этилган.

Таъкидланишича, мижоз банкка мурожаат қилган вақтдан мазкур картани расмийлаштириш ва фаоллаштиришга қадар бўлган муддат 5 дақиқани ташкил этади. Яъни, одамларга картани рўйхатдан ўтказиш ва олиш учун банкка икки марта келиш шарт эмас, мижоз мурожаат қилган кундаёқ дарҳол UzCard картасини олиши ва молиявий операцияларни амалга ошириш мумкин”, – дея тушунтирган компания.

Марказ томонидан NFC технологияли карталардан фойдаланишда контактсиз тўловни қабул қилиш ва бошқа операцияларни амалга ошириш учун терминал инфратузилмасини ривожлантириш давом эттирилиши қайд этилди. Мазкур карталар билан жамоат транспортида йўл ҳақини тўлаш мумкин бўлади.

Шунингдек, Uzcard карта рақамлари бошланишидаги “8600” рақам жуфтлиги “5614”га алмаштирилади. Агар карта кобейжинг Uzcard-Union Pay бўлса, карта “6262” рақам жуфтлиги билан, карта кобейжинг UzCard-Mastercard бўлса, карта “5440” рақам жуфтлиги билан бошланади.

• Uzcard