“Док-1 Макс” ва “Амбронол” дори воситалари истеъмоли оқибатида жабрланган оилаларга жами 80 миллиард сўм компенсация тўланди. Бу ҳақда Соғлиқни сақлаш вазирлиги матбуот хизмати маълум қилди.

Тошкент шаҳар жиноят ишлари бўйича судининг ижро ҳужжатларига мувофиқ, 90 нафар жабрланувчи фойдасига жами 82 миллиард сўм компенсация ундирилиши белгиланган эди. Бироқ айбдорларнинг хатланган мол-мулкини сотиш жараёни чўзилгани сабабли дастлаб маблағнинг 16,8 миллиард сўми, яъни 20 фоизи тўланган.

Жабрланган оилаларга моддий ва маънавий зарарни қоплаш ишларини тезлаштириш бўйича Президент топшириғига асосан давлат бюджетидан 65,2 миллиард сўм ажратилди. Натижада бугунги кунга қадар 88 нафар жабрланувчига жами 80 миллиард сўм тўлаб берилди.

Вазирлик маълумотига кўра, тўловларнинг 72,2 миллиард сўми “Док-1 Макс” ва “Амбронол” истеъмоли оқибатида вафот этган 72 нафар боланинг оилаларига, 7,8 миллиард сўми эса даволанган ва даволанаётган 16 нафар боланинг оилаларига берилган.

Қолган икки нафар боланинг оила аъзоларига банк карталари билан боғлиқ техник масалалар ҳал этилгач, яна 2 миллиард сўм тўлиқ тўлаб берилиши кутилмоқда.

Давлат бюджетидан ажратилган маблағ айбдорларнинг мол-мулкини сотиш ва улардан ундириладиган маблағлар ҳисобидан республика бюджетига қайтарилади.

Айни пайтда масъул давлат ташкилотлари ва тиббиёт марказлари мутахассислари жабрланган оилаларга қўшимча тиббий ҳамда психологик ёрдам кўрсатиш чораларини кўрмоқда.