АҚШ президенти бу ҳақда ўзининг Truth Social ижтимоий тармоғидаги саҳифасида маълум қилди. Бу АҚШ Венесуэла президенти Николас Мадурони қўлга олиш мақсадида ўтказган операциясидан бор-йўғи бир неча кун ўтганидан кейин содир бўлди.

“Венесуэланинг ўтиш давридаги ҳукумати Қўшма Штатларга 30–50 миллион баррель юқори сифатли, санкциялар остидаги нефть етказиб беради. Ушбу нефть бозор нархида сотилади, бу пуллар Венесуэла халқи ҳамда Қўшма Штатлар манфаатларига хизмат қилишига кафолат бериш учун мен — АҚШ президенти сифатида уларни назорат қиламан. Гап катта пуллар ҳақида кетяпти”, — деб ёзди Оқ уй раҳбари.

Доналд Трампнинг сўзларига кўра, у АҚШ энергетика вазири Крис Райтга “ушбу режани дарҳол амалга ошириш” топшириғини берган. Президентнинг таъкидлашича, Венесуэла нефти кемалар орқали олиб кетилади ва тўғридан-тўғри Қўшма Штатларга етказилади.

Венесуэла ҳудудидаги нефть захиралари дунёдаги энг йирик аниқланган захиралар ҳисобланади. 2005 йилгача бу мамлакат АҚШ учун нефтнинг энг йирик етказиб берувчиси бўлган. Бироқ вазият тубдан ўзгарди: 2007 йилда Венесуеланинг ўша пайтдаги раҳбари Уго Чавес саноатни миллийлаштиришни амалга ошириб, шу жумладан, мамлакатда ишлаётган АҚШ компанияларига тегишли мулкларни ҳам мусодара қилган.

3 январь куни тунги пайт Венесуэлада америкалик ҳарбийлар томонидан ўтказилган ҳарбий операциядан сўнг Трамп АҚШ компаниялари “мамлакатга келиб, миллиардлаб доллар сарфлайди ва вайрон бўлган инфратузилмани тиклайди”, – дея маълум қилган.

• АҚШ
• Трамп
• Венесуэла
• нефть