Халқ демократик партияси (ХДП) Тошкент вилояти Чиноз тумани ҳокимининг ободонлаштирилмаган ҳудудларга “Шармандали маҳалла”, айрим хонадонларга эса “Уятли хонадон” ёзувларини ўрнатиш бўйича берган топшириғи юзасидан муносабат билдирди.

Партия бундай амалиёт фуқароларнинг шаъни, қадр-қиммати, шахсий ҳаёти ва уй-жой дахлсизлиги каби Конститутсияда кафолатланган ҳуқуқларига зид эканини таъкидлади. ХДПга кўра, хонадонлар ва маҳаллаларни обод қилиш муҳим ташаббус бўлса-да, бу жараён фуқароларни камситиш ёки тамғалаш орқали эмас, балки қонунийлик, ҳамкорлик ва амалий кўмак асосида амалга оширилиши лозим.

Шунингдек, партия маҳаллаларнинг ободлиги йўллар, ичимлик суви, электр ва газ таъминоти, муҳандислик коммуникатсиялари ҳамда чиқиндиларни ўз вақтида олиб чиқиш каби хизматларнинг сифатли ташкил этилишига ҳам боғлиқлигини қайд этди. Шу боис, маҳаллий ҳокимликлар ва масъул ташкилотлар ўз зиммасидаги вазифаларни ўз вақтида ва сифатли бажариши зарурлиги таъкидланди.

ХДП инсон шаъни ва қадр-қимматини камситувчи, қонунчиликда назарда тутилмаган усулларни қўллаш демократик ҳуқуқий давлат тамойилларига зид эканини билдириб, барча мутасаддиларни фуқаролар билан мулоқотда қонун устуворлиги, инсон қадри, ижтимоий тенглик ва ҳамкорлик тамойилларига риоя қилишга чақирди.