Миграция агентлиги маълумотига кўра, Россияда қийин вазиятга тушиб қолган 597 нафар Ўзбекистон фуқароси ватанга қайтарилди. Улар орасида 110 нафар аёл ва 228 нафар вояга етмаган шахс бор.

Жорий йилнинг июль ойида Москва шаҳридаги ваколатхонага мурожаат қилган жами 774 нафар фуқарога ижтимоий, ҳуқуқий ва амалий ёрдам кўрсатилди. Жумладан, 91 нафарга бир марталик моддий ёрдам ажратилди, 83 нафар бошпанасиз қолган фуқаро бир ой муддатга бепул хостелга жойлаштирилди.

Бундан ташқари, оғир касалликка чалинган 3 нафар мигрантнинг даволаниш харажатлари қисман қоплаб берилди. Бир ой давомида 860 нафар мурожаатчига ҳуқуқий ва амалий ёрдам кўрсатилди. Хусусан, 64 нафар фуқаронинг 4 миллион рубль миқдоридаги иш ҳақи ундириб берилди, 53 нафарга Ўзбекистонга қайтиш гувоҳномаси расмийлаштирилди, 31 нафар фуқаронинг иш берувчи томонидан олиб қўйилган шахсини тасдиқловчи ҳужжатлари қайтарилди.

Шунингдек, ишсиз қолган 220 нафар Ўзбекистон фуқароси 7 та корхонага ишга жойлаштирилди, 712 нафар мигрантга ҳуқуқий маслаҳатлар берилди.

Аввалроқ, жорий йилнинг биринчи ярмида Россияга ишлаш мақсадида борган хорижликлар орасида Ўзбекистон фуқаролари энг кўп сонни ташкил этгани ҳақида хабар берилганди.