Маълум қилинишича, Янги Тошкент шаҳрида бир-бирига боғланган метро ва трамвай тармоқларини қуриш режалаштириляпти. Янги шаҳарга метронинг иккита линияси орқали – “Буюк ипак йўли” ва “Дўстлик” бекатларидан 30-35 дақиқада бориш мумкин бўлади.

“Агар буни бошламасак, Тошкентда 5 йилдан кейин одамлар яшолмайди”, дея Янги Тошкент шаҳри қурилишига изоҳ берди президент Шавкат Мирзиёев. Президент 5 сентябрь куни Янги Тошкент шаҳри бош режасининг давлат раҳбари учун қилинган тақдимотида: “32 йил ичида биринчи марта намунавий, жаҳон стандартларига мос лойиҳа қиляпмиз. Бу 300-400 йилга, невара-чевара ва ҳоказо келгуси авлодларимизга қолиши керак, биздан кейинги авлод ҳам буни давом эттириши керак”, – дея таъкидлади.

Қурилиш вазири ўринбосари, Янги Тошкент шаҳрини барпо этиш дирекцияси раҳбари Давронжон Одиловнинг айтишича, транспорт-логистика масаласи бўйича Жанубий Корея, Германия ва Туркиядан мутахассислар жалб қилиниб, ҳозирги мавжуд Тошкент шаҳрининг транспорт макромодели яратилган.

“Иккита метро линиямиз янги шаҳар билан боғланади. “Буюк ипак йўли” ва “Дўстлик” метро бекатларидан 30-35 дақиқада янги шаҳарга етиб келиш имконияти яратилади. Бу аҳоли учун жуда катта қулайлик бўлади, автомобилда келишга эҳтиёж ҳам қолмайди”, – деди Давронжон Одилов “Менимча” телекўрсатувида намойиш этилган интервьюсида.

Эслатиб ўтамиз, 2022 йилнинг ноябрида Шавкат Мирзиёевнинг Парижга ташрифи чоғида Тошкент трамвайини қуриш билан Франциянинг Alstom компанияси шуғулланишига келишилганди.

• Метро
• Тошкент
• Трамвай