Россияда иш ҳақини ололмаган 8 нафар ўзбекистонликнинг меҳнат ҳуқуқлари суд орқали ҳимоя қилинди. Натижада уларнинг фойдасига иш берувчилардан жами 1 миллион 519 минг 786 рубль ундириш ҳақида ижобий қарорлар қабул қилинди. Бу ҳақда Миграция агентлиги хабар берди.

Маълум қилинишича, жорий йилнинг октабр ойида Россияда иш берувчилар билан меҳнат низосига дуч келган фуқароларнинг ҳар бири бўйича суд ишлари кўриб чиқилган.

Ундириладиган маблағ иш ҳақи бўйича қарздорлик, тўловларни кечиктирганлик учун компенсация ҳамда маънавий зарар тўловларини ўз ичига олади.

Миграция агентлиги хорижда ишлаш давомида меҳнат ҳуқуқлари бузилган ёки иш ҳақини ололмаган фуқароларни ёрдам сўраб мурожаат қилишга чақирди.

Эслатиб ўтамиз, жорий йилнинг дастлабки тўққиз ойида хорижда ишлаётган 817 нафар ўзбекистонлик фойдасига иш берувчилардан жами 850 минг АҚШ доллари ундириб берилгани хабар қилинган эди.