Uzoq yillar davomida chekka hudud aholisi yagona tibbiy maskan sifatida foydalangan Urgut tumanidagi 21-sonli oilaviy poliklinika to‘liq rekonstruksiya qilindi.

1972-yilda qurilgan ushbu muassasa tumanining “Bahrin” mahallasida joylashgan bo‘lib, 16 ta qishloq — 13 mingdan ortiq aholi uchun yagona tibbiy xizmat markazi hisoblanadi. Bino yarim asrdan ortiq vaqt davomida kapital ta’mir ko‘rmagan.

Vaqt o‘tishi bilan binoning holati yomonlashgan: devorlar zax bosgan, oynalar xiralashgan, tomdan suv o‘tgan. Shunday og‘ir sharoitlarda ham shifokorlar bemorlarni qabul qilib kelgan.

2025-yil dekabr oyida ushbu holat Prezident Administratsiyasi rahbari Saida Mirziyoyeva tomonidan joyiga chiqib o‘rganilgan.

Prezident Shavkat Mirziyoyev tashabbusi bilan sog‘liqni saqlash tizimini modernizatsiya qilish doirasida mazkur poliklinika to‘liq yangilandi. Qo‘shimcha korpus qurildi, 20 o‘rinli yangi tug‘ruq bo‘limi tashkil etildi.

Endilikda aholi zamonaviy, yorug‘ va qulay sharoitlarda tibbiy xizmatlardan foydalanmoqda. Mutasaddilarga ko‘ra, bu loyiha chekka hududlarda sog‘liqni saqlash infratuzilmasini yaxshilashga qaratilgan izchil islohotlarning amaliy natijasidir.