O‘zbekistonda 2025-yilda 3 milliondan ortiq obunachiga ega 6 nafar mashhur bloger jami 2,7 milliard so‘m daromad olgan. Ular tomonidan davlat budjetiga 110,4 million so‘m soliq to‘langan.

Soliq qo‘mitasi ma’lumotlariga ko‘ra, mamlakatda 2 mingdan ortiq bloger faoliyati aniqlangan. Ularning 110 nafari o‘rganilgan bo‘lib, 66 nafari soliq to‘lagani ma’lum bo‘lgan.

Tahlillarda ayrim blogerlar katta daromad va keng auditoriyaga ega bo‘lsa-da, hanuz soddalashtirilgan faoliyat shaklidan foydalanayotgani qayd etildi.

Alohida o‘rganilgan 6 nafar bloger bir yil davomida 360 ta stories va 184 ta reklama posti joylashtirgan. Rasmiy hisobotlarda ularning umumiy daromadi 2,7 milliard so‘m ekani ko‘rsatilgan.