Prezident Shavkat Mirziyoyev Qurbon hayiti munosabati bilan ehtiyojmand aholini ijtimoiy-iqtisodiy jihatdan qo‘llab-quvvatlash yuzasidan takliflar taqdimoti bilan tanishdi.

Mamlakatimizda inson qadrini ulug‘lash, aholini ijtimoiy himoya qilish hamda jamiyatda mehr-oqibat va hamjihatlik muhitini mustahkamlash davlat siyosatining ustuvor yo‘nalishlaridan biri hisoblanadi. Bu tamoyillar, ayniqsa, Qurbon hayiti kunlarida yanada yorqin namoyon bo‘ladi.

Taqdimotda tegishli vazirlik va tashkilotlar tomonidan ishlab chiqilgan takliflar ko‘rib chiqildi.

Unga ko‘ra, Qurbon hayiti arafasida keng ko‘lamli ijtimoiy qo‘llab-quvvatlash tadbirlari amalga oshiriladi.

Jumladan, og‘ir kasalliklarga chalingan 10 ming nafar bolada jarrohlik amaliyotlari o‘tkazish, 2,3 ming nafar bemorni davolash va tekshiruvlardan o‘tkazish hamda 350 nafar bemorda transplantatsiya amaliyotlarini moliyalashtirish rejalashtirilgan.

Shuningdek, 8 mingdan ortiq yetim va ota-ona qaramog‘idan mahrum bolalarning hisobvaraqlariga 200 AQSH dollari miqdorida mablag‘ o‘tkaziladi.

500 ta masjidda tahoratxonalarni qurish va ta’mirlash, qabristonlarni obodonlashtirish ishlari amalga oshiriladi.

Ehtiyojmand oilalar, yolg‘iz keksalar va nogironligi bo‘lgan shaxslar uchun oziq-ovqat to‘plamlari tarqatiladi.

Mazkur tadbirlar “Vaqf” xayriya jamoat fondi mablag‘lari hisobidan moliyalashtiriladi.

Prezidentimiz barcha chora-tadbirlar shaffof va manzilli amalga oshirilishi zarurligini ta’kidladi.