Davlat xavfsizlik xizmati hamda “Toshkent-Aero” ixtisoslashtirilgan bojxona kompleksi xodimlari hamkorligida Toshkent xalqaro aeroportida o‘tkazilgan tezkor tadbir davomida katta miqdordagi oltin quymalarning mamlakatdan noqonuniy olib chiqib ketilishiga chek qo‘yildi.

Ma’lum bo‘lishicha, “Toshkent — Dubay” yo‘nalishi bo‘yicha parvoz qilishni rejalashtirgan, 1980-yilda Andijon viloyatida tug‘ilgan va hozirda Toshkent shahrida yashovchi shaxsning yuklari tekshirilgan.

Tekshiruv jarayonida unga tegishli chamadonning ichki tayanch qismiga yashirilgan jami 1 kg 923 gramm oltin quymalari aniqlanib, ashyoviy dalil sifatida rasmiylashtirib olingan.

 Shuningdek, ushbu noqonuniy holatga 1992-yilda Toshkent viloyatida tug‘ilgan, muqaddam Jinoyat kodeksining 182-moddasi bilan sudlangan fuqaroning ham aloqadorligi ma’lum qilindi.

Hozirda holat yuzasidan tergovga qadar tekshiruv harakatlari olib borilmoqda