Bugun, 20-iyun kuni Boliviya prezidenti Rodrigo Pas mamlakatda davom etayotgan ommaviy norozilik namoyishlari fonida favqulodda holat rejimini e’lon qildi. Ma’lum qilinishicha, mazkur qaror namoyishchilar tomonidan to‘sib qo‘yilgan yo‘llarni ochish, transport qatnovini tiklash hamda aholiga tibbiy yordam ko‘rsatishda yuzaga kelayotgan muammolarni bartaraf etish maqsadida qabul qilingan. Prezidentning ta’kidlashicha, yo‘llarning yopib qo‘yilishi fuqarolarning kundalik hayotiga jiddiy ta’sir ko‘rsatmoqda. Xususan, aholining ishga borishi, ta’lim olishi, zarur mahsulotlarni xarid qilishi va oilasini ta’minlash imkoniyatlari cheklanib qolmoqda. «Favqulodda holat oddiy hayotni izdan chiqarish uchun emas, balki uni qayta tiklash uchun joriy etildi», — dedi Rodrigo Pas.

Eslatib o‘tamiz, Boliviyada norozilik namoyishlari o‘tgan oydan buyon davom etmoqda. Namoyishchilar prezident iste’fosi, mehnat shartlarini qayta ko‘rib chiqish hamda ayrim qonunlarni bekor qilishni talab qilmoqda. Mamlakatdagi siyosiy vaziyat esa hamon tarangligicha qolmoqda.