Navoiy viloyatida yuk avtomashinasini jarima maydonidan chiqarib olish maqsadida YPX inspektoriga pora taklif qilgan haydovchi qo‘lga olindi. Ma’lum bo‘lishicha, Karmana tumanidagi doimiy YPX maskanida tekshiruv vaqtida samarqandlik haydovchi yuk avtomashinasini ruxsatnomada ko‘rsatilgan yo‘nalishdan chetga chiqqan holda boshqargani aniqlangan. Shu sabab unga nisbatan ma’muriy bayonnoma rasmiylashtirilib, transport vositasi vaqtincha saqlash maydoniga joylashtirilgan.

Keyinchalik haydovchi bayonnomani hal qilib berish va avtomashinani jarima maydonidan chiqarish evaziga mas’ul inspektorga ming AQSH dollari miqdorida pora taklif qilgan. Tezkor tadbir davomida u pulning bir qismi — 7 million 100 ming so‘mni berayotgan vaqtida ashyoviy dalillar bilan ushlangan. Hozirda mazkur holat yuzasidan jinoyat ishi qo‘zg‘atilib, dastlabki tergov harakatlari olib borilmoqda.